ពេលដែលខ្ញុំសិក្សានៅអនុវិទ្យាល័យ និងវិទ្យាល័យ ការសិក្សាគណិតវិទ្យាគឺគ្រាន់តែជាករណីយកិច្ចសម្រាប់ខ្ញុំប៉ុណ្ណោះដែលត្រូវសិក្សាមុខវិជ្ជានេះ គឺខ្ញុំពុំបានដឹងឲស៊ីជម្រៅទៅលើអត្ថប្រយោជន៍នៃការសិក្សានេះឡើយ ក្រៅអំពីគិតថាវាជាមុខវិជ្ជាសម្រាប់បង្កើនប្រាជ្ញា នៃការគិតរបស់មនុស្សទូទៅតែប៉ុណ្ណោះ ។

ក៏ ប៉ុន្តែពេលដែលខ្ញុំឈានជើងចូលមហាវិទ្យាល័យផ្នែកពាណិជ្ជសាស្រ្ត ខ្ញុំចាប់ផ្ដើមដឹងថា មុខវិជ្ជាគណិតវិទ្យាគឺពិតជាត្រូវការសម្រាប់ជំនាញមហាវិទ្យាល័យមួយនេះ ក៏ ប៉ុន្តែវាគ្រាន់តែមួយផ្នែកប៉ុណ្ណោះនៃអ្វីដែលខ្ញុំបានរៀននៅក្នុងថ្នាក់វិទ្យាល័យ ហើយក៏ដូចជាមិនមានអ្វីដែលស្មុគ្រស្មាញ និងច្រើននោះដែរដូច្នេះមានន័យថានិស្សិតដែលរៀនជំនាញនេះប្រហែលជាមិនត្រូវការលក្ខខណ្ឌខ្ពស់ពេកទេសម្រាប់មុខវិជ្ជាគណិតវិទ្យាមួយនេះ ។ រហូតមកដល់ខ្ញុំបន្ថែមការសិក្សានៅក្នុងមហាវិទ្យាល័យព័ត៌មានវិទ្យា ដែលពេលនោះគឺជាជំនាន់ទី១ ហើយក្មេងៗស្រុកខ្មែរក៏មិនបានដឹងស៊ីជម្រៅអំពីជំនាញនេះយ៉ាងដូចម្ដេចដែរ ឧទាហរណ៍ខ្ញុំ ក៏ដូចជាមិត្តភក្រ្តមួយចំនួនទៀតគិតថាមហាវិទ្យាល័យព័ត៌មានវិទ្យា គឺនឹងសិក្សាពីការផ្សព្វផ្សាយ ការសរសេរ ឬបោះពុម្ពសារព័ត៌មានប៉ុណ្ណោះ ហើយក៏នាំគ្នីគ្នាដាក់ពាក្យចូលរៀនទៅ ។

ប៉ុន្តែពេលដែលខ្ញុំចូលដល់ឆ្នាំទី១កាលណានៃមហាវិទ្យាល័យនេះ អ្វីដែលខ្ញុំចាប់អារម្មណ៍បំផុតគឺទាក់ទងនឹង គណិតវិទ្យា យ៉ាងហោចណាស់នៅពេលនោះ គឺខ្ញុំបានឮពាក្យថា binary ដែលជាប្រព័ន្ធលេខប្រើប្រាស់តែចំនួនពីរលេខប៉ុណ្ណោះគឺ 1 និង 0 ហើយវាត្រូវឲយើងដឹងពីរបៀបគណនាលេខពីប្រព័ន្ធគោល១០ (ដែលជាប្រព័ន្ធលេខយើងប្រើប្រាស់ជាទូទៅគឺមានលេខចាប់ពី 0 ដល់ 9) ទៅកាន់ប្រព័ន្ធគោល២នេះ ។

ទាក់ទងនឹង binary នេះ បើអ្នកគិតឲស៊ីជម្រៅ គឺវាបង្ហាញថាប្រព័ន្ធកុំព្យូទ័រ ក៏ដូចជាគ្រឿងអេឡិកត្រូនីកផ្សេងៗ បានប្រើប្រាស់វា ដើម្បីតំណាងនូវរលកសញ្ញាពាក្យពេចន៍ និងការដោះស្រាយគ្រប់បញ្ហាដែលអ្នកបាន បញ្ជាទៅកាន់គ្រឿងអេឡិកត្រូនីកនោះ សូម្បីតែគ្រាន់តែអ្នកចុចអក្សរ A មួយក៏កុំព្យូទ័ររបស់អ្នកចាំបាច់ត្រូវបំប្លែងតួសញ្ញានេះទៅជា binary ផងដែរគឺស្មើនឹង “01000001” ។ តើអ្នកគិតថា លេខ binary ទាំងនេះវាចេញដោយចៃដន្យ ឬ?

ទេ គឺវាបានមកពីការគណនាដោយគណិតវិទ្យា ក្នុងនោះបានមកពីមូលដ្ឋានដែលអ្នកបានសិក្សាក្នុងគណិតវិទ្យាដូចជា ផលបូក ផលគុណ ផលចែក ផលចែកយកសំណល់ អិចស្ប៉ូណង់ស្យែល តក្កវិទ្យា នេះខ្ញុំគ្រាន់តែនិយាយពីមូលដ្ឋានដំបូងដែលយើងទើបបានរៀនមហាវិទ្យាល័យព័ត៌មានវិទ្យានាសប្ដាហ៍ទីមួយប៉ុណ្ណោះ ។

បន្តពីមុខវិជ្ជាមូលដ្ឋានដែលសម័យខ្ញុំរៀនគេហៅថា “Introduction to PC” គឺមានមុខវិជ្ជាមួយទៀតគឺ ភាសាសរសេរកម្មវិធី Qbasic (គ្យូបេហ្សិក) និងឆមាសបន្ទាប់នៃឆ្នាំទី១គឺ ភាសាសរសេរកម្មវិធីមួយផ្សេងទៀតគឺ Pascal (ប៉ាស្កាល់) ភាសា programming ទាំង២នេះ បច្ចុប្បន្នគឺឈប់មានទៀតហើយ ។ ពេលដែលខ្ញុំចាប់ផ្ដើមសិក្សាភាសា programming គឺធ្វើឲខ្ញុំដឹងកាន់តែច្បាស់ថា មុខវិជ្ជាគណិតវិទ្យាគឺពិតជាសំខាន់នៅក្នុងជីវិតរស់នៅ ជាពិសេសគឺការងារដែលត្រូវដោះស្រាយដោយកុំព្យូទ័រ ។ ហេតុអ្វីដែលខ្ញុំនិយាយបែបនេះ? ព្រោះរាល់ដំណាក់កាលនៃការសរសេរកូដ ដើម្បីបញ្ជាកុំព្យូទ័រធ្វើអ្វីមួយ គឺយើងចាំបាច់ណាស់ត្រូវពឹងផ្អែកទៅលើគណិតវិទ្យាផ្នែកតក្កវិទ្យា ដែលទាក់ទងនឹងភាពពិត (true ឬ 1) និងមិនពិត (false ឬ 0) ពីព្រោះគឺយើងតម្រូវឲកូដមានការសិក្សាលក្ខខណ្ឌទៅតាមសកម្មភាព និងបំណងដែលយើងចង់ឲកុំព្យូទ័រធ្វើតាម ។

ចូលមកដល់ឆ្នាំបន្តបន្ទាប់មានមុខវិជ្ជាភាសា programming ផ្សេងៗទៀតដូចជា C, C++, Visual C++ និង Visual Basic (មុខវិជ្ជា programming ដែលរៀន
សម័យខ្ញុំជានិស្សិត) ក្រៅពីមុខវិជ្ជា programming គឺមានមុខវិជ្ជា Network, Data Structure, Database ។ ល ។ អ្នកអាចនឹងមិនគិតថា មុខវិជ្ជាទាំងនោះ
កើតឡើងដោយភាពចាំបាច់នៃគណិតវិទ្យានោះទេ ការពិតវា មិនដូច្នេះឡើយគ្រប់មុខវិជ្ជា ឬក៏គ្រប់សកម្មភាពដែលពាក់ព័ន្ធនឹងកុំព្យូទ័រដាច់ខាតត្រូវតែមានការចូលរួម 
ដោយគណិតវិទ្យាជាចាំបាច់ ។ 
តើអ្នកមានដឹងទេថា Network ចាំបាច់ដែរ ឬទេត្រូវមានការចូលរួមដោយគណិតវិទ្យា ? 
ប្រហែលជាអ្នកអាចឆ្លើយដោយស្ទាក់ស្ទើរ ហើយក៏មិនដឹងថាតើអ្វីខ្លះទៅដែលត្រូវប្រើគណិតវិទ្យានោះ? ខ្ញុំគ្រាន់តែលើកយកនូវសំណួរមួយសួរអ្នកទៅវិញថា តើអ្នកធ្លាប់
បានឮពាក្យថា security ដែរ ឬទេ? អ្នកប្រាកដជាឆ្លើយយ៉ាងលឿនថា គឺពិតជាឮពាក្យនេះហើយញឹកញាប់ទៀត ។ ចម្លើយនេះមានន័យថាអ្នកបានទទួលស្គាល់រួច
ហើយអំពីវត្តមានគណិតវិទ្យានៅក្នុងផ្នែក Network តើជាអ្វីទៅ? ដើម្បីបានរូបមន្តសម្រាប់ការពារសុវត្ថភាពទិន្នន័យពេលដែលមានការផ្លាស់ប្ដូរពីកុំព្យូទ័រទៅកុំព្យូទ័រមួយ
ផ្សេងទៀតតាមរយៈ network ដែលក្នុងនោះមានដូចជា intranet និង internet គឺចាំបាច់រូបមន្តនោះកើតឡើងដោយ គណិតវិទ្យាផ្នែកផលគុណ ផលដក 
ផលចែកយកសំណល់ អិចស្ប៉ូណង់ស្យែល តក្កវិទ្យា ការគណនាចំនួនបឋម ។ អ្នកអាចឃើញភាពជាក់ស្ដែងនៃការធ្វើប្រមាណវិធីទាំងនោះដោយគ្រាន់តែសិក្សាទៅលើ 
protocol មួយរបស់ network គឺ RSA (Rivest-Shamir-Adleman) នោះអ្នកនឹងបានយល់កាន់តែច្បាស់ អំពីអត្ថប្រយោជន៍គណិតវិទ្យានៅក្នុងផ្នែក Network ។

ងាកទៅកាន់ផ្នែក database ដែលជាផ្នែកមួយដ៏សំខាន់ ហើយវាក៏បានចូលរួមយ៉ាងសកម្មទៅលើការគ្រប់គ្រងទិន្នន័យ ក្នុងការងារផ្សេងៗនៅលើពិភពលោក បើគ្មាន database ពិភពលោកនឹងមិនអាចដំណើរការគ្រប់គ្រងអ្វីៗបានដោយរលូន និងឆាប់ រហ័សនោះទេ ។ តើ database ត្រូវការគណិតវិទ្យាដែរ ឬទេ? ច្បាស់ណាស់មធ្យោបាយច្រោះទិន្នន័យតាមតម្រូវការរបស់អ្នកដោយប្រព័ន្ធគ្រប់គ្រង database គឺស្ដែងចេញពីការធ្វើការរបស់គណិតវិទ្យាជាច្រើនមេរៀនដែលបានរៀននៅវិទ្យាល័យដូចជា៖ មេរៀនសំនុំ តក្កវិទ្យា ហ្វាក់តូរីយែល ប្រូបាប៊ីលីតេ អាំងតេក្រាល កំផ្លិច និងមូលដ្ឋានពិជគណិតដទៃទៀត ទោះបីជាបែបនេះក៏ដោយ ខ្ញុំគិតថាសម្រាប់អ្នកគ្រាន់តែធ្វើការទៅលើផ្នែកនេះក្នុងភាពជា user វាហាក់បីដូចជាមិនសាំញ៉ាំដល់បែបនេះទេ ក៏ ប៉ុន្តែបើសិនអ្នកជា developer ទៅលើផ្នែកនេះក្នុងកម្រិតខ្ពស់ច្បាស់ណាស់ថាវាតម្រូវឲអ្នកត្រូវតែចេះមូលដ្ឋានគណិតវិទ្យាទាំងអស់នេះ ។

ឥឡូវនេះខ្ញុំសូមបង្វែរការចាប់អារម្មណ៍របស់អ្នកទៅលើផ្នែក graphics និងផ្នែកសំឡេង វិញម្ដង ថាតើវាចាំបាច់ដែរ ឬទេអំពីគណិតវិទ្យានោះ? បើនិយាយពីគណិតវិទ្យានៅក្នុងផ្នែក graphics និងផ្នែកសំឡេង គឺប្រាកដណាស់មានគ្រប់មេរៀនរបស់គណិតវិទ្យាទាំងពិជគណិត និងធរណីមាត្រដែលគ្រប់គ្នាបានរៀន ។ អ្នកបានឃើញ games ដ៏ស្រស់ស្អាតមួយកំពុងបង្ហាញខ្លួននៅក្នុង monitor របស់អ្នកវាមិនមែនជារូបរាង្គដែលកើតឡើងដោយការជប់ចេញពីអាទិទេពនោះទេ ក៏ ប៉ុន្តែវាបានមកពីការគណនាសមីការដ៏ច្រើនដូចជា សមីការបន្ទាត់ សមីការរង្វង់សម្រាប់កំណត់ទីតាំង និងទិសដៅនៃរូបភាព ការគណនា អិចស្ប៉ូណង់ស្យែល និងតក្កវិទ្យា ដើម្បីកំណត់ចំណុច pixels សម្រាប់បង្ហាញរូបភាព ការប្រើប្រាស់ vectors, ម៉ាទ្រីស, អាំងតេក្រាល សម្រាប់ភាពបត់បែន និងចលនារបស់រូបភាព ឬរលកសំឡេង ការប្រើប្រាស់ធរណីមាត្រក្នុងលំហសម្រាប់កំណត់ភាពប្រសព្វគ្នា និងចំណាំងផ្លាតនៃពន្លឺ និងចលនានៃរូបភាពផ្សេង ។ ល ។

ដូច្នេះជាការសន្និដ្ឋានចុងក្រោយរបស់ខ្ញុំគឺប្រាកដណាស់ បើអ្នកមានបំណងចង់សិក្សាផ្នែកព័ត៌មានវិទ្យា គឺអ្នកនឹងមិនអាចគេចផុតឡើយពីការប្រើប្រាស់គណិតវិទ្យាក្នុងអាជីពនេះ គ្រាន់តែតិច ឬច្រើនអាស្រ័យទៅលើស្ថានភាពការងារ និងកម្រិត developer របស់អ្នកប៉ុណ្ណោះ ។ យ៉ាងហោចណាស់មូលដ្ឋានគណិតវិទ្យាដែលអ្នកជា programmer ត្រូវតែចេះគឺ សំនុំ និងតក្កវិទ្យា បើពុំដូច្នេះទេ អ្នកនឹងមានភាពយឺតយ៉ាវ ឬគិតមិនគ្រប់ជ្រុងជ្រោយទៅលើដំណោះស្រាយក្នុងកម្មវិធីរបស់អ្នកជាក់ជាមិនខាន ។ ខ្ញុំក៏សូមបញ្ជាក់បន្ថែមថាថ្វីត្បិតតែកុំព្យូទ័រត្រូវការគណិតវិទ្យាយ៉ាងខ្លាំងក្លាក៏ដោយ ក៏មិនមានន័យថាគ្រប់អ្នកពូកែរគណិតវិទ្យាសុទ្ធតែអាចរៀនផ្នែកព័ត៌មានវិទ្យាពូកែរនោះដែរ ហើយអ្នកដែលខ្សោយគណិតវិទ្យាសុទ្ធតែមិនអាចរៀនផ្នែកព័ត៌មានវិទ្យាបានជាដាច់ខាតនោះទេ សំខាន់ក៏ត្រូវពឹងផ្អែកលើទេពកោសល្យ និងជាពិសេសបំផុតគឺការតាំងចិត្ត ការតស៊ូ និងភាពអត់ធ្មត់ខ្ពស់របស់ខ្លួនប៉ុណ្ណោះ ។

♦♦♦ នៅក្នុងអត្ថបទក្រោយៗ ខ្ញុំនឹងលើកយកផ្នែកគណិតវិទ្យាមួយចំនួនមកអនុវត្តន៍ជាកូដនៅក្នុងភាសា programming មកបង្ហាញជូន ។

♦♦♦ ប្រសិនបើប្អូនៗចង់រៀនមហាវិទ្យា IT ទទួលបានជោគជ័យ មុខវិជ្ផាដែលប្អូនគួររៀនបំប៉នបន្ថែមដំបូងគឺ Computer Foundaton និង C/C++ មិនមែនគណិតវិទ្យា ឬរូបវិទ្យានោះទេ

តើអតីតសិស្សធ្លាប់សិក្សាជំនាញបន្ថែមនៅថ្នាក់បណ្តុះបណ្តាលបច្ចេកវិទ្យាអាន-ANT ណាខ្លះដែលខ្សោយគណិតតែ ជោគជ័យលើវិថីបច្ចេកវិទ្យារហូតដល់សព្វថ្ងៃ?

១. លាម លីដារ៉ា គិតត្រឹមខែវិច្ឆិកា ឆ្នាំ ២០២២ សិក្សាជាមន្រ្តីអភិវឌ្ឍន៍និងតេសសុវត្ថិភាពកូដប្រពន្ធ័ព័ត៌មាន ក្រសួងប្រៃណីយ៍ និងទូរគមនាគមន៍ សម្រាប់ព័ត៌មានលម្អិត → http://antkh.com/tech/2680

២. ឡី កំថូង គិតត្រឹមខែវិច្ឆិកា ឆ្នាំ ២០២២ សិក្សាជាស្ថាបនិក PAPA Delivery & CheckinMe សម្រាប់ព័ត៌មានលម្អិត → http://antkh.com/tech/2720

៣. ឡូវ ហុងថវិកា គិតត្រឹមខែវិច្ឆិកា ឆ្នាំ ២០២២ សិក្សាជាស្ថាបនិក OneWorld Technology សម្រាប់ព័ត៌មានលម្អិត → http://antkh.com/tech/2670

៤. ជា សេងហាក់ គិតត្រឹមឆ្នាំ ២០២០ ជា Senior Backend Developer and DevOps នៅក្រុមហ៊ុន Slash Foundry សម្រាប់ព័ត៌មានលម្អិត → http://antkh.com/tech/2675

♦ អ្នកជំនាន់មុនខ្លាំងសិនទើបអាចបណ្តុះបណ្តាលអ្នកជំនាន់ក្រោយឲ្យពូកែ

ការចាប់អារម្មណ៍រៀនសរសេរកូដតាំងពីនៅក្មេង គួបផ្សំនិងការជ្រើសរើសសិក្សានៅ AUPP High School - Foxcroft Academy ដែលបានបញ្ចូលកម្មវិធី STEM ធ្វើឲ្យសិស្សបានស្វែងយល់និងមានឱកាសបង្ហាញពីទេពកោសល្យរបស់ខ្លួន លើការប្រកួតប្រជែងក្នុងសាលារហូតដល់ឆាកអន្តរជាតិ