សមិទ្ឋផលលេចធ្លោរបស់ក្រុមហ៊ុន OneWorld Technology គឺ AngKor DC App (ជាកម្មវិធីមើលភាពយន្តក្នុងទូរសព្ទដៃ) ។ → https://www.facebook.com/OneWorldSoftware

♦ ជាអតីតសិស្សធ្លាប់សិក្សានៅអាន-ANT កំឡុងឆ្នាំ ២០១៥ សម្រាប់ព័ត៌មានលម្អិត http://training.antkh.com/students/?s=1325

គិតត្រឹមឆ្នាំ ២០២០ អតីតសិស្ស ឡូវ ហុងថវិកាជា Head of R&D Center នៃក្រុមហ៊ុនអន្តរជាតិ RIGHTSLEDGER ដែលជាក្រុមហ៊ុនការពារកម្មសិទ្ធិបញ្ញានូវស្នាដៃរបស់អ្នកនិពន្ធដោយប្រើប្រាស់បច្ចេកវិទ្យា Blockchain

→ បច្ចុប្បន្ន (គិតត្រឹមខែ ធ្នូ ឆ្នាំ ២០២៤) អតីតសិស្ស ឡូវ ហុងថវិកា ជាស្ថាបនិកក្រុមហ៊ុន OneWorld Technology

ខ្ញុំចាប់ផ្តើមរៀនសរសេរកូដតាំងពីថ្នាក់ទី ១០ កាលនោះខ្ញុំអាយុទើបតែ ១៥ឆ្នាំ បើគិតមកដល់ឆ្នាំ ២០២០ ខ្ញុំមានបទពិសោធន៍ ជិត៥ឆ្នាំលើការសរសេរកូដ វាមានហេតុផលមួយចំនួនដែលធ្វើឲ្យខ្ញុំចង់សិក្សាវិទ្យាសាស្រ្តកុំព្យូទ័រ ។ កាលពី ៦ឆ្នាំមុនពេលណា ដែលខ្ញុំត្រូវការ លុយខ្ញុំនឹងសុំពីម៉ាក់របស់ខ្ញុំ ។ គាត់មិនចូលចិត្តខ្ញុំសុំលុយគាត់ទេ ហើយបានស្តីបន្ទោសខ្ញុំដោយសារបញ្ហាហិរញ្ញវត្ថុរបស់គាត់ ។ ពេលនោះខ្ញុំមានអារម្មណ៍ថាខ្ញុំចង់រកប្រាក់ដោយខ្លួនឯង ។ ខ្ញុំបានឃើញអ្នកបញ្ចូលបទភ្លេងនៅតាមដងផ្លូវ អាចរកប្រាក់បានតាមរយៈ ការប្រើប្រាស់កុំព្យូទ័រ ។ ពេលនោះខ្ញុំបានសម្រេចចិត្តរៀនកុំព្យូទ័រ ហើយគិតថាប្រហែលជាថ្ងៃណាមួយខ្ញុំអាចរកចំណូលបានដោយ ខ្លួនឯង ។

ខ្ញុំបានចុះឈ្មោះចូលរៀនវគ្គខ្លីមូលដ្ឋានគ្រឹះកុំព្យូទ័រ នៅសាលាក្រោយផ្ទះ ។ ខ្ញុំបានឃើញ សិស្ស និងគ្រូមួយចំនួនអាចរកលុយបាន ដោយគ្រាន់តែដំឡើងកម្មវិធី Windows OS ឲ្យអ្នកដទៃ ។ បន្ទាប់ពីខ្ញុំបញ្ចប់វគ្គសិក្សានេះ ខ្ញុំចាប់ផ្តើមចេះជួសជុល Software និង Hardware ដោយខ្លួនឯង ។

ក្នុងអំឡុងពេលអាយុ ១៣ ឆ្នាំ ខ្ញុំគិតថា ខ្ញុំនឹងចាប់ផ្តើមអាជីរកម្មតូចមួយ ដើម្បីផ្ដល់ សេវាកម្មជួសជុលកុំព្យូទ័រ ។ អាជីវកម្មជួសជុលកុំព្យូទ័រ មិនបានផលចំណេញទេ ។ ខ្ញុំសន្សំបាន ១៥០ដុល្លា ពីថ្ងៃចូលឆ្នាំចិនមកទិញកុំព្យូទ័រខូចចំនួន ៣គ្រឿងពីហាងលក់កុំព្យូទ័រជជុះ នៅផ្លូវកម្ពុជាក្រោម ហើយព្យាយាមជួសជុលវា ដើម្បីលក់បន្ត ។ ចាប់ផ្តើមដំបូង ខ្ញុំអាចលក់បានតែ១គ្រឿងប៉ុណ្ណោះ ទៅឲ្យមិត្តរួមថ្នាក់របស់ខ្ញុំ ដែលគេចូលចិត្តលេងហ្គេម ហើយ២គ្រឿងទៀត គឺលក់មិនចេញវានៅសល់ក្នុងបន្ទប់គេង របស់ខ្ញុំដល់សព្វថ្ងៃ ។ ចំពោះផ្នែកដំឡើង Software ខ្ញុំមិនដែលមានអតិថិជនក្រៅពីពូ របស់ខ្ញុំទេ ដែលបានឲ្យខ្ញុំដំឡើងកម្មវីធី Windows ឲ្យគាត់ ។ ខ្ញុំនៅតែចង់រកលុយ ប៉ុន្តែដោយគិតថានៅក្នុងអាជីវកម្មជួសជុលកុំព្យូទ័រសម្បូរទៅដោយហាងជួសជុល ច្រើនជាងតម្រូវការរបស់អតិថិជន ។ ខ្ញុំក៏បានទៅពិភាក្សាបញ្ហានេះជាមួយគ្រូបង្រៀន ជួសជុលកុំព្យូទ័ររបស់ខ្ញុំហើយ គាត់បានប្រាប់ខ្ញុំថា វិធីល្អបំផុត ដើម្បីរកលុយជាមួយកុំព្យូទ័រគឺ រៀនសរសេរកម្មវីធីកុំព្យូទ័រ ។ កាលនោះខ្ញុំទើបមានអាយុ ១៤ ឆ្នាំទេ ហើយ មិនទាន់មានសាលាបច្ចេកទេស នៅភ្នំពេញណាដែលទទួលយក ខ្ញុំឲ្យរៀនថ្នាក់សរសេរ កម្មវិធីកុំព្យូទ័រទេ ដោយសារវ័យរបស់ខ្ញុំនៅក្មេងពេក ។

តែសំណាងល្អគ្រូបង្រៀនជួសជុលកុំព្យូទ័ររបស់ខ្ញុំ បានណែនាំឲ្យជួបនឹង សាលាបណ្តុះបណ្តាលបច្ចេកវិទ្យាអាន-ANT និងរួមទាំងជួយ ក្នុងការសម្របសម្រួលជាមួយនឹងខាងសាលា ដើម្បីឲ្យខ្ញុំបានរៀននៅទីនោះ ទោះត្រូវរៀនជាមួយសិស្ស មានវ័យចាស់ជាងក៏ដោយ ។

សេចក្តីចូលចិត្ត រួមផ្សំនឹងការព្យាយាមអនុវត្តបាន ធ្វើឲ្យសាលាមានការទុកចិត្ត នឹងបន្តឲ្យខ្ញុំរៀនបន្តពីមួយកម្រិតទៅមួយកម្រិតទៀត ។

ខ្ញុំចំណាយពេលប្រហែលជិត ២ឆ្នាំ ដើម្បី បណ្តុះបណ្ដាលទាំងក្នុង និងក្រៅសាលាដោយចាប់ផ្តើមពី C/C++ និងបញ្ចប់ដោយថ្នាក់ C# Advance ។

- បន្ទាប់ពីទទួលបានការបណ្ដុះបណ្ដាល ជាលើកដំបូងខ្ញុំបានជួយសរសេរកម្មវីធីគ្រប់គ្រង

- ធនធានមនុស្ស និងកម្មវិធីគិតប្រាក់ (POS) ឲ្យក្រុមហ៊ុនតូចមួយនៅ ក្នុងស្រុកក្នុងពេល

- តែមួយខ្ញុំបានបង្កើត Software ចំនួនពីរគឺទាក់ទងទៅនឹង ការគ្រប់គ្រងភោជនីយដ្ឋាន និងសេវាកម្មអាហារ

→ ស្នាដៃបញ្ចប់វគ្គសិក្សា C/C++ របស់គាត់នៅអាន-ANTសូមចូលទៅកាន់ http://training.antkh.com/achievements/512.aspx

→ ស្នាដៃបញ្ចប់វគ្គសិក្សា C# Beginning របស់គាត់នៅអាន-ANTសូមចូលទៅកាន់ http://training.antkh.com/achievements/514.aspx

បន្ទាប់មកទៀត ខ្ញុំបានរៀនបង្កើតមិត្តភក្តិ និងទំនាក់ទំនងជាមួយមនុស្សវ័យចាស់ជាច្រើននាក់ ។ ក្រោយមកមានម្ចាស់ក្រុមហ៊ុនម្នាក់ បានឃើញថាខ្ញុំមានទឹកចិត្តក្នុងការរៀនសរសេរកូដ និងចេះរកប្រាក់ដោយខ្លួនឯង គាត់បានផ្ដល់ឱកាសកម្មសិក្សា ក្នុងនាមជាអ្នកបង្កើតគេហទំព័រ នៅក្រុមហ៊ុនរបស់គាត់ទាំងរូបខ្ញុំនៅវ័យមិនដល់ ១៧ឆ្នាំផង ។ ដោយសារតែភាពមមាញញឹកនឺងការងារ ហើយកំពុងរៀនពេញម៉ោងនៅវិទ្យាល័យថ្នាក់ទី ១០ ខ្ញុំបានសម្រេចចិត្តបញ្ចប់ការសិក្សានៅវិទ្យាល័យអស់ ២ឆ្នាំ ហើយផ្តោតសំខាន់លើកម្មវិធីរៀនតាម online ដោយខ្លួនឯង ។ រួចហើយក៏ចូលរៀនវិញនៅថ្នាក់ទី ១២ តែម្តងតែដោយគ្មានចំនូលចិត្ត និងអាចនិយាយបានថា គ្មាននិស្ស័យ នឹងការសិក្សានៅវិទ្យាល័យ ក៏ត្រូវបានសម្រេចចិត្តបោះបង់ការសិក្សាជាថ្មី ហើយនៅតែមិនបានរៀនចប់ចុងចប់ដើម ដូចមិត្តដទៃទៀតរបស់ខ្ញុំ ។ ខ្ញុំនៅតែបន្តរៀនកែលំអរ និងពង្រីកជំនាញរបស់ខ្ញុំតាមពេល ដែលអាចធ្វើទៅបានហើយខ្ញុំរីករាយ ក្នុងការស្វែងយល់ពីបច្ចេកវិទ្យា ដែលកំពុងតែរីកចម្រើនថ្មីៗ ។ គិតត្រឹមឆ្នាំ ២០២០ ខ្ញុំមានអាយុ ១៩ឆ្នាំហើយ ខ្ញុំនៅតែមមាញឹកនឹង ការរៀនសូត្រដោយខ្លួនឯង និងបង្កើនជំនាញរបស់ខ្ញុំហើយក៏មានតួនាទី ជា Head of R&D Center នៃក្រុមហ៊ុនអន្តរជាតិ RIGHTSLEDGER ដែលជាក្រុមហ៊ុនការពារកម្មសិទ្ធិបញ្ញានូវស្នាដៃ របស់អ្នកនិពន្ធដោយប្រើប្រាស់បច្ចេកវិទ្យា Blockchain ផងដែរ ។

យុវជនក្មេងដែលចង់រៀនជំនាញបច្ចេកទេស នៅពេលនេះមិនសូវពិបាកដូចមុនទេ ព្រោះសាលាជំនាញមានច្រើនជាងពេលមុនៗដែលអាចឲ្យ យុវជនវ័យក្មេងរៀនបានដូចជាថ្នាក់បណ្តុះបណ្តាលបច្ចេកវិទ្យា អាន- ANT ជាដើម ឬក៏អាចឆ្លៀតឱកាសរៀន បានដោយ ខ្លួនឯង ដូច្នេះត្រូវរកចំណុចចាប់ផ្តើមដោយខ្លួនឯង ហើយទៅតាមផ្លូវរបស់អ្នក ដើម្បីឆ្ពោះទៅរកភាពជោគជ័យ ។ ក្នុងនោះដែរ RIGHTSLEDGER ជាក្រុមហ៊ុនអន្តជាតិមួយ ដែលផ្ដល់ប្រពន្ធ័ការពារកម្មសិទ្ធបញ្ញានូវស្នាដៃរបស់អ្នកនិពន្ធ ក៏ត្រូវការជ្រើសរើស Software Development ជាច្រើននាក់ទាំងអ្នកមានបទពិសោធន៍ និង អ្នកមិនទាន់មានបទពិសោធន៍ ។ វាជាឱកាសសម្រាប់ Software Development ជនជាតិខ្មែរយើងបង្ហាញស្នាដៃទៅឲ្យបរទេសបានឃើញ ៕

ដំបូន្មានរបស់ខ្ញុំចំពោះមនុស្សវ័យក្មេង គឺត្រូវចាប់ផ្តើមស្វែងរកសុបិន្តរបស់អ្នកតាមមធ្យោបាយណាមួយ ដែលអាចធ្វើទៅបានពីព្រោះបច្ចេកវិទ្យាតែងតែ រីកចម្រើនឆ្ពោះទៅមុខជានិច្ច ហើយវាតែងតែមានតម្លៃនៅគ្រប់អ្វីដែលអ្នករៀនបាននៅក្នុងជីវិត ៕

→ ប្រសិនបើមានចង្ងល់ ឬមានសំណួរផ្សេងៗសូមផ្ញើសារចូល Facebook : https://www.facebook.com/anttrainning ឬ https://t.me/anttechnology