For Android device For iOS device
២៨
ធ្នូ

ធ្វើ​យ៉ាង​ដូចម្ដេចទើបអាចជោគជ័យ​ក្នុង​ការរៀន Programming ?

អធិប្បាយដោយលោក សំ កក្កដា នាយក​ទស្សនាវដ្ដី និង​ថ្នាក់​បណ្តុះបណ្តាលអាន-ANT

ធ្វើ​យ៉ាង​ដូចម្ដេចទើបអាចជោគជ័យ​ក្នុង​ការរៀន programming ? ឬ​ហៅថារៀន​សរសេរ​កម្មវិធី​កុំព្យូទ័រ​ (Software Development) អាចទទួលបានជោគជ័យថាតើត្រូវរៀនដូចម្ដេច ?

​សំណួរ​នេះ​ខ្ញុំ​តែងបាន​ឮ​ជាញឹកញាប់ ពីប្អូនៗ​និស្សិត​ផ្នែក​វិទ្យាសាស្រ្ត​កុំព្យូទ័រ នៅពេល​ដែល​ពួកគេ​ហាក់បី​ដូចជា អស់​សង្ឃឹម​នឹងការ​សិក្សា​លើឯកទេសមួយនេះ ឬ​ក៏​នៅពេល​ដែល​ពួកគេ​ស្រេកឃ្លាន នឹងការចង់បាន​នូវ​ចំណេះដឹង​នេះ យ៉ាង​តក់ក្រហល់ ។

ជាការពិតណាស់អ្វីៗ​ក៏​ដោយវាពឹងផ្អែក​ទៅលើ​ការតស៊ូព្យាយាម និង អំណត់ចំពោះ​ការងារ​នោះ  បើសិនជាយើងចង់ទទួលជោគជ័យពីវា ក៏ ប៉ុន្តែ​វា​ក៏​ត្រូវតែមានការរួម​ចំណែក​ពីទេពកោសល្យ និង ចំណង់ចំណូលចិត្ត​ទៅលើ​ការងារ​នោះ​ផងដែរ ។ យើងបានឃើញ​និស្សិត​មួយចំនួន គាត់​ក៏​ពុំមែនជាអតីតសិស្សពូកែប្រចាំសាលា ឬ ថ្នាក់ ឬ​ក៏​ពូកែលើមុខវិជ្ជា ​គណិតវិទ្យា រូបវិទ្យានោះទេ ប៉ុន្តែ​ពួកគេ​អាចទទួលបានជោគជ័យ ព្រមទាំង​លទ្ធផល​ល្អ​ទៀតផង នៅ​ក្នុង​ការរៀនមហាវិទ្យាល័យ​ព័ត៌មាន​វិទ្យា នេះ​ក៏​ដោយសារ​ពួកគេ​មានចំណង់ចំណូលចិត្ត មានទិសដៅ និង មហិច្ឆតាជា​ពិសេស  កត្តាប្រឹងប្រែងរបស់​ពួកគេ នោះហើយជា​ចំណុច​ដែល​ពួកគេ​អាចចាប់ផ្ដើម ចេញ​ដំណើរ​ដ៏ល្អ​ជាមួយនឹង​ឯកទេសមួយនេះ ។
យោងតាមបទពិសោធន៍ខ្លួន​ខ្ញុំ​ក៏​ធ្លាប់​ជាសិស្ស និង និស្សិត​ដែល​បានរៀន​នូវ​ផ្នែក​ព័ត៌មាន​វិទ្យានេះ គួបផ្សំនឹងបទពិសោធន៍​ការងារ​ផ្នែក IT តាំងពី​ឆ្នាំ​១៩៩៣ និងការបង្រៀនរបស់​ខ្ញុំ​តាំងពី​ឆ្នាំ ១៩៩៨  ​ខ្ញុំ​សូម​ផ្ដល់​នូវ​អនុសាសន៍​៦​ចំណុច ដែល​សង្ឃឹម​ថាអាចជួយជា​តម្រុយ​ខ្លះ​សម្រាប់​ការ​សិក្សា​របស់ប្អូនៗ​ជំនាន់​ក្រោយ ។
​ចំណុច​ទី១: រៀន​បង្កើត​កម្មវិធី​ដោយខ្លួនឯង
ប្អូនៗ​ប្រាកដជាដឹងច្បាស់ណាស់ថា ការរៀន​ផ្នែក​វិទ្យាសាស្រ្ត​កុំព្យូទ័រ គឺនឹង​បង្កើត​កម្មវិធី​កុំព្យូទ័រ​សម្រាប់​ដោះស្រាយអ្វីមួយ ដើម្បី​អ្នក​ដទៃ ឬ​ក៏ ដើម្បី​ការងារ​ខ្លួនឯង ដូច្នេះប្អូនៗ​ត្រូវ​ទម្លាប់​ស្វែងយល់ពីការ​បង្កើត​កម្មវិធី​កុំព្យូទ័រ​ដោយចាប់ចេញពី​ចំណុច​តូចតាចទៅ ជា​ពិសេស​រាល់​ការងារ homework ឬ assignment  គឺប្អូនត្រូវតែព្យាយាមបំពេញវា​ឲ្យ​បានទោះបីជាខុស​ខ្លះ​ក៏​ដោយ
វាមិនមែនជារឿងល្អ ដែល​ប្អូនៗ​ខិតខំ​ចម្លង​កូដពីអ្នក​ដទៃ ដើម្បី​បំពេញកិច្ចការរបស់គ្រូ​ដែល​បានដាក់​ឲ្យ ដោយខ្លួនឯង​មិនបាន​មើល ឬ​យល់សូម្បីបន្តិចសោះនោះ ។ ជាការពិតណាស់ការធ្វើ​កម្មវិធី​មួយទោះបីជាតូចក្ដី ក៏​រមែងត្រូវការពេលវេលារបស់ប្អូនៗ​ដែរ ប៉ុន្តែ​វាគឺជាការតព្វកិច្ច​ដែល​អ្នក​សិក្សា​វិទ្យា​កុំព្យូទ័រ គប្បីត្រូវតែធ្វើ ព្រោះ​ពេល​ដែល​ប្អូនៗ​បង្កើត​កម្មវិធី​តាមរយៈ​ការ​សរសេរ​កូដ វាតែងតែមានកំហុស ទោះតិច ឬ​ច្រើន នោះហើយគឺជា​សិក្សា​របស់យើង ដើម្បី​ដកបទពិសោធន៍ និងដឹងថាតើកូដនោះហេតុអ្វីបានជាមានកំហុស ? ពេល​ដែល​ប្អូនៗ​រកឃើញកំហុសគឺ​មានន័យថា​ប្អូនបានចេះ និងយល់ពី​ដំណើរ​ការ​កូដនោះ ។

​ចំណុច​ទី២: ស្វែងយល់ទ្រឹស្ដីមុននឹងប្អូនៗ​ចាប់ផ្ដើម​ប្រើ​ប្រាស់​កូដ​ណាមួយ​
​ក៏​មាន​និស្សិត​មួយចំនួន​ដែល​ធុញទ្រាន់ នឹងការបកស្រាយទ្រឹស្ដី ឬ​ក៏​សិក្សា​ទ្រឹស្ដីរបស់គ្រូ​ទៅលើ​កម្មវត្ថុនៃកូដ ប៉ុន្តែ​ប្អូនៗ​ត្រូវចងចាំថាការ​សិក្សា​ពីទ្រឹស្ដី និង យល់ពីកម្មវត្ថុនៃកូដនោះ វាគឺជាហេតុផលដ៏រឹងមាំ​សម្រាប់​ប្អូនៗ​ក្នុង​ការរៀនជំនាញនេះ ព្រោះ​ថាប្អូនៗ​នឹងអាចមានគំនិត​បង្កើត​ថ្មីច្នៃប្រឌិត នូវ​អ្វី​ដែល​ប្អូនៗ​ចេះ ជា​ពិសេស​វា​ក៏​ជា​មូលដ្ឋាន​ដែល​យើងអាចឈោងចាប់​ទៅលើ​ជំនាញនៃភាសា programming ដទៃ​ទៀតបានដ៏​ងាយស្រួល ហើយបើសិនជាប្អូនៗ​ពុំបានដឹងទ្រឹស្ដី ឬ​យល់ច្បាស់​ពីកម្មវត្ថុនៃកូដ ឬ functions (អនុគមន៍) សំខាន់​ៗ​ដែល​ពាក់ព័ន្ធភាសានោះទេ គឺ​ក៏​មានន័យថា​ប្អូនៗ​នឹង​មិនអាច បង្កើត​កម្មវិធី​កុំព្យូទ័រ ឬ​ក៏​អាច​ស្វែងរក​កំហុស​ក្នុង​កូដនោះបានឡើយ ។
​ចំណុច​ទី៣: ដឹងពីគោលដៅរបស់ខ្លួនឯង
ប្អូនៗ​ប្រហែលជាអាចយល់ថា ធ្វើអ្វី​ក៏​ដោយត្រូវតែមានគោលដៅ ព្រោះ​គោលដៅ វានឹង​កំណត់​ថាប្អូនៗ ត្រូវចេញពី​ចំណុច​ណាហើយ​បញ្ចប់​ត្រឹម​ចំណុច​ណា ។  វាមិន​ខុសពី​ប្អូនៗ​បើកបរម៉ូតូ ឡាន ឬ​ជិះកង់បើអ្នក​មិនបាន​ដឹងពីគោលដៅថាតើប្អូន​កំពុង​ទៅណា?  នោះប្អូននឹងខាតពេល ឬ​បាត់បង់ថវិកា ឬ​ក៏​បាត់បង់ជីវិត​ដោយសារ​តែរេរា និង អាចជួបគ្រោះ​ថ្នាក់​ចរាចរណ៍​ផងដែរ ។
ការ​សិក្សា​ជំនាញ​កុំព្យូទ័រ​វា​ក៏​ដូច្នេះប្អូនៗ​ត្រូវតែមានទិសដៅ និងគោល​បំណង​ដ៏ជាក់លាក់ ដែល​ខ្ញុំ​តែងនិយាយ​នូវ​ពាក្យមហិច្ឆតា ព្រោះ​ថាបើប្អូនៗ​មានមហិច្ឆតាប្អូនៗ​នឹងមានផែនការ ព្រមទាំង​ទិសដៅ ជា​ពិសេស​ពេល​ដែល​ប្អូនៗ​មានមហិច្ឆតាប្អូនត្រូវតែខំប្រឹង ដើម្បី​សម្រេច​នូវ​មហិច្ឆតា និង តណ្ហានោះ ។
ប្អូនៗ​អាច​សម្រេច​ចិត្ត ចាប់យក​នូវ​ទិសដៅ​ណាមួយ​ក្នុង​ជំនាញ​ដូចជា ផ្នែក​រចនា (design) ផ្នែក​បណ្ដាញ​កុំព្យូទ័រ (network) ផ្នែក​គេហទំព័រ (websites) ផ្នែក windows ឬ mobile applications ។
​ចំណុច​ទី៤: សិក្សា​នៅ​ថ្នាក់​
ប្អូនៗ​ត្រូវគិតថាការទៅ​សិក្សា បន្ថែម​ក្នុង​ថ្នាក់​ជាមួយគ្រូគឺ​សំខាន់​ណាស់ វាមិនគ្រប់គ្រាន់ទេ​សម្រាប់​ការ download ឯកសារផ្សេងៗ​ពី internet ឬ​អានសៀវភៅតែម្នាក់ឯងនោះ ។ យើងត្រូវតែទៅ​ថ្នាក់​រៀន ជួបជាមួយគ្រូនៃមុខវិជ្ជានោះ ដើម្បី​ទទួល​នូវ homework ឬ assignment ជា​ពិសេស​ការស្ដាប់គ្រូពន្យល់ វាជាមធ្យោបាយ​លឿន​បំផុត​នៃការ​សិក្សា​របស់យើង​ព្រោះ​ថា ពេល​ដែល​ប្អូនៗ​អានឯកសារវា​ក៏​នឹងមាន​ចំណុច​ខ្លះ​ដែល​យើងពុំបានយល់ ឬ​ជួនកាល​ចំណុច​មួយ​ដែល​យើងត្រូវចេះ វាត្រូវបង្ខំ​ឲ្យ​យើងអានឯកសារ ឬ សៀវភៅជា​ច្រើន​ទើប​ស្វែងរក​ចំណុច​នោះបាន ព្រោះ​សៀវភៅអ្នក​និពន្ធ​មានវិធីសាស្រ្តពន្យល់ ឬ​បកស្រាយខុសៗ​គ្នា ។  ដូច្នេះពេល​ដែល​ប្អូនៗ​ទៅ​ថ្នាក់​រៀនប្អូនៗ​នឹងមានឱកាសស្ដាប់នូការពន្យល់់និង លើកឧទាហរណ៍​ផ្ទាល់​ពីគ្រូ ជា​ពិសេស​យើងអាចសួរគាត់ពី​បញ្ហា​ដែល​យើងមិនយល់ ហើយគ្រូគាត់នឹង​ធ្វើការ​បកស្រាយ ឬ​ជួនកាលគាត់​ក៏​នឹងជួយរក​ដំណោះ​ស្រាយ​ឲ្យ​យើង​ផងដែរ​តាមរយៈ​ការ​ស្រាវជ្រាវ​បន្ថែម​របស់គាត់ ហើយប្អូនៗ​ក៏​នឹងមានពេលវេលាជួបជាមួយមិត្តភក្តិ និងអាចចែក​រំលែក​នូវ​ការ​ស្រាវជ្រាវ​រៀងៗ​ខ្លួន ដល់​គ្នា​ទៅវិញទៅមក​ផងដែរ ។
​ចំណុច​ទី៥: ក្លាហាននឹងសួរ
ភាពខ្មាសអៀនវាគឺជាកត្តាបរាជ័យ នៃការ​សិក្សា​របស់អ្នក ដូច្នេះអ្នកត្រូវតែមានភាពក្លាហាននឹងសួរគ្រូ និងជំនួយការគ្រូ ឬ​មិត្តភក្តិ នូវ​អ្វី​ដែល​ប្អូនៗ​មិនយល់ ឬ​មិនចេះ ។
​គ្មាន​នណាម្នាក់​ដែល​ចេះគ្រប់​យ៉ាង​នោះទេ មនុស្សតែងរស់នៅដោយពឹងពាក់​គ្នា​ទៅវិញទៅមក នេះជាសត្យានុម័ត នៃការរស់នៅរបស់សត្វ​ក្នុង​លោក ។ ភាពអំនួតខ្លាចគេគិតថាខ្លួនអន់ ឬ​មិនចេះ ឬ​ល្ងង់ គឺច្បាស់ណាស់ថាប្អូនៗ​គឺជាមនុស្សល្ងង់ និង អវិជ្ជា ។
​យ៉ាង​ណាមិញប្អូនៗ​ក៏​មិនត្រូវគិត​ផងដែរ​ថាពេល​ដែល​នរណាម្នាក់​មិនអាច​ឆ្លើយនឹង​សំណួរ ឬ ពន្យល់អ្នកបាន គិតថា​ពួកគេ​ជាមនុស្សអន់ ឬ​មិនចេះ ព្រោះ​អ្វី​ក៏​ដោយវាមានព្រំដែន និង ភាពខ្វះខាត ឬ ផ្លូវ​អារម្មណ៍​ក្នុង​ពេល​ណាមួយ​នោះបណ្ដាល​មកពី​បញ្ហា​ស្មុគ្រស្មាញ ដែល​នេះ​មិនអាច​គេចផុតដោយមនុស្សគ្រប់​គ្នា បើប្អូនគិតបែបនោះ គឺនឹង​គ្មាន​នរណាម្នាក់ជួយឆ្លើយនឹងប្អូនឡើយ ។

​ចំណុច​ទី៦: ហ្វឹកហាត់កូដ​ឲ្យ​បានញឹកញាប់
ការ​សិក្សា​ភាសា programming គឺវាមិន​ខុសពី​ប្អូនៗ​សិក្សា​ភាសាបរទេសនោះទេ ការហ្វឹកហាត់និយាយ ឬ​ប្រើ​ប្រាស់​កូដជាញឹកញាប់នឹងធ្វើ​ឲ្យ​ប្អូនចងចាំវា ឬ​បានយល់ពីវាកាន់តែច្បាស់ ។ ប្អូនៗ​អាចហ្វឹកហាត់កូដបាន​តាមរយៈ​ការធ្វើ homework, assignment ឬ​ក៏​ត្រូវចេះរក​បញ្ហា​ដែល​នៅជុំវិញខ្លួន មក​បំប្លែង​ជាការ​បង្កើត​កម្មវិធី​ដោះស្រាយដោយ​កុំព្យូទ័រ​នោះហើយគឺជាបទពិសោធន៍របស់ប្អូនៗ​ដ៏ធំធេង​ក្នុង​ការ​សិក្សា​ភាសា programming ។
ប្អូនៗ​មិនត្រូវយកចិត្តទុកដាក់​នូវ​សម្ដី​របស់អ្នក​ដទៃ ដែល​បង្អាប់ប្អូនថា​កម្មវិធី​របស់ប្អូនអន់នោះឡើយ ប៉ុន្តែ​ប្អូនៗ​ត្រូវសប្បាយចិត្តនឹង​លទ្ធផល​ដែល​បាន​បង្កើត យ៉ាង​ហោចណាស់វា ក៏​បានជួយ​សម្រួល​ដល់អ្នក​ដទៃ​ដោយសារ​តែ​កម្មវិធី​របស់ប្អូន​ផងដែរ ។ ប្អូនៗ​ត្រូវចងចាំថាការ​បង្កើត​កម្មវិធី​ឲ្យ​បាន​ច្រើន គឺជាការយល់កាន់តែ​ច្រើន​អំពីកូដនិងបទពិសោធន៍ហើយ​នៅពេល​ណាមួយ​នោះ ប្អូននឹងអាចប្រមូលផ្ដុំ​នូវ​បទពិសោធន៍​ទាំងនោះ បង្កើត​ជា​ដំណោះ​ស្រាយដ៏ធំមួយបាន​សម្រាប់ ខ្លួនឯង​ក៏​ដូចជា​សង្គម ។

*** ចុចទីនេះ ដើម្បី​ទាញយក​កម្មវិធី ANT Croix បង្កើត​ដោយកូដ C++ http://www.antkh.com/tech/31

*** ចុចទីនេះ ដើម្បី Download កម្មវិធី​អានផេឌៀ ដំណើរ​ការ​លើ windows  http://www.antkh.com/antpedia

***ចុចទីនេះ ដើម្បី Download កម្មវិធី​អាន-ANT ដែល​ដំណើរ​ការ​លើ Android http://www.antkh.com/tech/2315

*** ចុចទីនេះ ដើម្បី​មើលស្នាដៃសិស្ស​ទាំងអស់​ដែល​បាន​បញ្ចប់​វគ្គ​សិក្សា​នៅអាន-ANT http://training.antkh.com/achievements/

*** ​សម្រាប់​មុខវិជ្ផា​ដែល​មាននៅ​ថ្នាក់​បណ្តុះបណ្តាលអាន-ANT http://training.antkh.com/

វាមានតែអ្នក​ដែល​ពុំបាន​បង្កើត​អ្វីទាល់តែសោះ  ហើយរង់ចាំតែរិះគន់កំហុសរបស់យើងទេ  ទើបជាអ្នក​គ្មាន​សមត្ថភាព​ពិតប្រាកដ ព្រោះ​ថាការនិយាយវា​ងាយស្រួល ប៉ុន្តែ​ការធ្វើវាជារឿងពិបាក ។

មតិ និង​យោបល់​ទៅលើ​អត្ថបទ​នេះ (តាម Facebook)

ខាងក្រោម​នេះ​ជា​យោបល់​ផ្សេងៗ​របស់​អ្នកទស្សនា