វិច្ឆិកា
អតីតសិស្សឆ្នើម៣ រូប នៃវិទ្យាល័យអេយូភីភីចូលរួមកម្មវិធីប្រកួតរ៉ូបូតអូឡាំព្យាដពិភពលោកឆ្នាំ២០២៣ (World Robot Olympiad 2023
អតីតសិស្សដែលបានបញ្ចប់ការសិក្សាពីវិទ្យាល័យអេយូភីភី (AUPP High School-Foxcroft Academy) ចំនួន ៣រូប បានសម្រេចនូវសមិទ្ធិផលដ៏អស្ចារ្យក្នុងកម្មវិធីប្រកួតរ៉ូបូតអូឡាំព្យាដកម្ពុជា ២០២៣ ដែលបានបញ្ចប់កាលពីខែតុលា ឆ្នាំ២០២៣ កន្លងមក ។ សិស្សឆ្នើមទាំង ៣រូបរួមមាន សំ វឌ្ឍនៈ ស្រេង ឆាយលី និង តែ សេងឡុង បានទទួលបានចំណាត់ថ្នាក់លេខ១ ក្នុងការប្រកួតថ្នាក់ជាតិក្នុងកម្មវិធីប្រកួតរ៉ូបូតអូឡាំព្យាដកម្ពុជា ២០២៣ (WRO Cambodia 2023) ដែលបានរៀបចំឡើងដោយអង្គការស្ទែមកម្ពុជា ។
គួររម្លឹកផងដែរថា កាលពីថ្ងៃទី១៧ ដល់ថ្ងៃទី ១៩ វិច្ឆិកា ២០២២ ក្រុមប្អូនៗ សំ វឌ្ឍនៈ ស្រេង ឆាយលី និង គង់ ប៊ុនថុង តំណាងឲ្យប្រទេសកម្ពុជា បានទៅចូលរួមប្រកួតវគ្គផ្ដាច់ព្រ័ត្រអន្តរជាតិ ដែលមាន ៣៦៥ ក្រុម (កម្ពុជាមានតែ១ក្រុម) មកពី ៧៣ប្រទេស នៃកម្មវិធីប្រកួតរ៉ូបូតអូឡាំព្យាដឆ្នាំ ២០២២ (World Robot Olympiad 2022) ដែលប្រព្រឹត្តទៅនៅទីក្រុង Dortmund ប្រទេសអាឡឺម៉ង់ ។
ថ្ងៃទី ០៧ ដល់ថ្ងៃទី ០៩ វិច្ឆិកា ២០២៣ នេះពួកគេ (សំ វឌ្ឍនៈ ស្រេង ឆាយលី និង តែ សេងឡុង) បានតំណាងឲ្យប្រទេសកម្ពុជា ដើម្បីទៅចូលរួមការប្រកួតវគ្គផ្ដាច់ព្រ័ត្រនៃកម្មវិធីប្រកួតរ៉ូបូតអូឡាំព្យាដ ២០២៣ (World Robot Olympiad 2023) ដែលមាន ៤៥១ ក្រុម (កម្ពុជាមានតែ១ក្រុម) ៧៧ ប្រទេសចូលរួម បានប្រព្រឹត្តទៅនៅ ទីក្រុងប៉ាណាម៉ា ប្រទេសប៉ាណាម៉ា ។
ទេពកោសល្យ និងសមត្ថភាពពិសេសរបស់ វឌ្ឍនៈនិងក្មួយៗ ក្នុងវិស័យរ៉ូបូត និងបច្ចេកវិទ្យាមិនត្រឹមតែជាជោគជ័យ និងមោទកភាពសម្រាប់ក្រុមគ្រួសារ សាលានិងជាពិសេសសម្រាប់ខ្លួនឯងផ្ទាល់ប៉ុណ្ណោះទេ តែបានក្លាយជាការលើកទឹកចិត្ត និងជាគម្រូដល់យុវជនជំនាន់ក្រោយដែលចាប់អារម្មណ៍លើវិស័យនេះផងដែរ ។
សំ វឌ្ឍនៈដែលជាប្រធានក្រុមបាននិយាយថា បញ្ហាប្រឈមធំសម្រាប់ពួកគេគឺមានពេលវេលាត្រឹម១ខែ មុនការទៅប្រកួតនៅ ប្រទេសប៉ាណាម៉ា ដើម្បីធ្វើការ រចនា បង្កើត ពិសេសលើការសរសេរកូដ ដើម្បីឲ្យរ៉ូបូតមានសមត្ថភាពបញ្ញាសិប្បនិម្មិត (AI)
ក្រៅពីត្រៀមខ្លួន ដើម្បីចូលរួមប្រកួតប្រជែងនៅលើឆាកអន្តរជាតិ វឌ្ឍនៈនិងក្មួយៗ មានបំណងបង្ហាញពីសមត្ថភាពផ្នែក បច្ចេកវិទ្យា និងភ្ជាប់ទំនាក់ទំនងជាមួយសិស្សានុសិស្សដទៃទៀតមកពីជុំវិញពិភពលោក ។ សម្រាប់អ្នកទាំងបី ជំនាញទាំងនេះ គឺជាស្ពានសម្រាប់ឲ្យប្អូនៗ ខិតខំប្រឹងប្រែងបន្តទៀតនាពេលអនាគត នៅពេលដែលប្អូនៗមានបំណងចាប់យកអាជីពផ្នែក មេកាត្រូនិច វិស្វកម្ម និងវិទ្យាសាស្ត្រកុំព្យូទ័រ ។
ជាចុងក្រោយ ក្មួយៗតំណាងក្រុម RO-BOAT សូមថ្លែងអំណរគុណក្រសួងទូគមនាគមន៍និងប្រៃសណីយ៍ ដែលផ្ដល់នូវការគាំទ្រ លើកទឹកចិត្ត ឧបត្ថម្ភក្រុម RO-BOAT កម្ពុជា បានចេញទៅប្រកួតនៅប្រទេសអាឡឺម៉ង់កាលពីឆ្នាំ ២០២២ និងឆ្នាំ ២០២៣ នៅប្រទេសប៉ាណាម៉ា ក្នុងគោលដៅលើកទឹកចិត្តដល់សិស្សានុសិស្សនិងយុវជនឲ្យមានការចាប់អារម្មណ៍លើជំនាញបច្ចេកវិទ្យាកាន់តែច្រើន ។
សូមអរគុណ AUPP High School - Foxcroft Academy ដែលបានបញ្ចូលកម្មវិធី STEAM ធ្វើឲ្យសិស្សបានស្វែងយល់ និងមានឱកាសបង្ហាញពីទេពកោសល្យរបស់ខ្លួនលើការប្រកួតប្រជែងក្នុងសាលា រហូតដល់ឆាកអន្តរជាតិ ។
ក្មួយៗ ក៏មិនភ្លេចអរគុណលោកគ្រូអ្នកគ្រូនិងថ្នាក់ដឹកនាំនៅ CADT ដែលផ្ដល់ទីកន្លែង រោងជាងនិងសម្ភារៈពិសោធន៍ ព្រមទាំងចូលរួមបណ្តុះបណ្តាលពួកយើងខ្ញុំមុននឹងចេញទៅប្រកួតនៅ ប្រទេសប៉ាណាម៉ា
→ ដកស្រង់ចេញពី https://www.facebook.com/sam.kakada "គួររម្លឹកផងដែរ កាលពី៥ឆ្នាំមុន វឌ្ឍនៈទើបអាយុ បាន១៣ឆ្នាំ ហើយបានសិក្សាមុខវិជ្ជាចំនួន៣នៅថ្នាក់បណ្តុះបណ្តាលបច្ចេក វិទ្យាអាន-ANT គឺ Programming C/C++, HTML script និងភាសា Programming C# ។ លុះពេលវឌ្ឍនៈចូលរៀន AUPP High School - Foxcroft Academy ដោយមានកម្មវិធីសិក្សាល្អៗនិងការយកចិត្តទុកដាក់ពីគ្រូនៅទីនោះ នៅថ្នាក់ទី១១ វឌ្ឍនៈក៌មានបំណងចង់បង្កើត Robot ដើម្បីប្រកួតប្រជែងនៅក្នុងសាលានិងថ្នាក់ជាតិតាមលំដាប់លំដោយ ដោយខ្ញុំជាប៉ារបស់គេបានជ្រោមជ្រែង បង្ហាត់បង្រៀនកូដ Python និងបច្ចេកវិទ្យា AI ផងដែរ ។ ដោយភាពច្នៃប្រឌឹតនិងការតាំងចិត្តប្រកបដោយមហិច្ឆតាចង់ចូលរួមប្រកួតលំដាប់អន្តរជាតិ វឌ្ឍនៈរួមទាំងមិត្តភក្តិជិតស្និតចំនួនពីរអ្នកទៀតដែលសុទ្ធតែជាសិស្សឆ្នើមនៅ AUPPHS-FA គឺក្មួយ គង់ ប៊ុនថុង (ជាអតីតសិស្សធ្លាប់រៀននៅ ថ្នាក់បណ្តុះបណ្តាលបច្ចេកវិទ្យាអាន-ANT មុខវិជ្ផា C/C++ & HTML script) និងក្មួយ ស្រេង ឆាយលី បានបង្កើតក្រុមមួយឈ្មោះថា RoBoat និងចាប់ផ្ដើមបង្កើត Robot ដោយមានបញ្ចូលនូវបញ្ញាសិប្បនិម្មិត AI ដើម្បីចូលរួមប្រកួតជម្រុះថ្នាក់ជាតិ WRO 2022 ដោយទទួលបានជ័យលាភីបន្តការប្រកួត WRO 2022 ជម្រុះពិភពលោកនៅទីក្រុង Dortmund ប្រទេសអាឡឺម៉ង់ ហើយថ្មីៗនេះក៏បានបន្តការប្រកួត WRO 2023 នៅទីក្រុង Panama នៃប្រទេសប៉ាណាម៉ា ដែលជាការប្រកួតលើកទីពីរផងដែរ ។ រាល់ Robots ដែលក្រុម RoBoat កម្ពុជាយើងបានចូលរួមគឺសុទ្ទតែបានបំពាក់នូវបច្ចេកវិទ្យា AI ផងដែរ ។ "
♥ សូមសំណាងល្អកើតមានដល់ក្រុមកម្ពុជាយើង គឺក្រុម RoBoat ♥
មតិ និងយោបល់ទៅលើអត្ថបទនេះ (តាម Facebook)
ខាងក្រោមនេះជាយោបល់ផ្សេងៗរបស់អ្នកទស្សនា